१५ भदौ, काठमाडौं । अर्जेन्टिनाका राष्ट्रपति अल्बर्टो फर्नान्डेजले लिओनल मेसीलाई आफ्नै गृहभूमिमा फर्केर नेवल्स ओल्ड ब्वाइजमा करियर अन्त्य गर्न आग्रह गरेका छन् ।
मेसीले आश्चर्यजनक रुपमा क्लब छाड्ने घोषणाले पछिल्लो साता धेरै हेडलाइन्स बने । ला लिगाले मेसीले क्लब छाड्न रिलिज क्लज लागु हुने जनाएपछि यसमा नयाँ ट्वीस्ट थपिएको छ । यदि अन्य क्लबले मेसीलाई अनुबन्ध गर्न चाहेमा ७०० मिलयन युरो रिलिज क्लज तिर्नुपर्नेछ ।
मेसी भने समरमा नयाँ सिजन सुरु हुनुअघि क्याटलान क्लब जसरी पनि छाड्न चाहन्छन् । क्लब भने जसरी पनि मेसीलाई क्लबमा राख्न कसरत गरिरहेको छ ।
यसै सन्दर्भमा अर्जेन्टिनाका राष्ट्रपति फर्नान्डेजले मेसीलाई आफ्नै देशमा फर्केर खेलेको हेर्न चाहेको बताएका छन् । नेवल्स ओल्ड ब्वाइजका फ्यानहरुले पनि रोसारियोमा परेड निकाल्दै मेसी क्लबमा फर्कनुपर्छ भनेर समर्थन गरेका थिए । ‘तिमी हाम्रो मुटुमा छौँ र हामीले कहिल्यै पनि हाम्रो देशमा तिमीले खेलेको देखेका छैनौँ । तिम्रो क्लब नेवल्समा करियर अन्त्य गरेको हेर्ने अवसर हामीलाई देउ,’ फर्नान्डेजले सी फाइभ एनमार्फत मेसीलाई पठाएको सन्देशमा भनेका छन् ।
फर्नान्डेजले बोएनस आयर्स साइड क्लब अर्जेन्टिनो जुनियर्सको समर्थन गर्छन् र उनले आफू डिएगो म्याराडोनाका ठूलो फ्यान भएको बताएका छन् । ‘म्याराडोनाको सबैभन्दा ठूलो कुरा भनेको उनले एक्लै विश्व विरुद्ध खेले,’ फर्नान्डेजले भने, ‘मैले म्याराडोना जस्तो खेलाडी देखेको छैन । म उनीबाट एकदमै प्रभावित छु, मेसीभन्दा बढी, इमान्दार भएर भन्दा, किनकी उनी अर्जेन्टिनोस युथबाट आएका थिए । उनी ग्लाडिएटर जस्ता थिए, उनमा अविश्वसनीय शक्ति थियो ।’
source https://www.onlinekhabar.com/2020/08/892919
0 comments:
Post a Comment