१ मंसिर, काठमाडौं । नेपाली राष्ट्रिय फुटबल टोलीबाट तीन खेलाडीले डेब्यु गरेका छन् ।
फिफा विश्वकप २०२६ र एएफसी एसियन कप २०२७ को संयुक्त छनोटको दोस्रो चरणको खेलमा युएई विरुद्ध नेपालका छिरिङ गुरुङ, योगेश गुरुङ र अन्जन राईले डेब्यु गरेका हुन् ।
बिहीबार राति दुबईको अल मोक्तोम स्टेडियममा भएको समूह एचको उक्त खेलमा नेपाल युएईसँग ४-० ले पराजित भएको थियो ।
उक्त खेलमा पहिलो रोजाईँमा खेल्दै डिफेण्डर छिरिङले डेब्यु गरेका हुन् । जावलाखेल युथ क्लबबाट घरेलु फुटबल खेल्ने छिरिङले राष्ट्रिय टिममा पहिलो पटक स्थान बनाएका हुन् र पहिलो पटकमै उनले डेब्युको अवसर पाए ।
यस्तै थ्रीस्टारका युवा डिफेण्डर योगेश गुरुङ र नेपाल पुलिस क्लबबाट खेल्ने अर्का डिफेण्डर अन्जन राईले पनि वैकल्पिक खेलाडीको रुपमा मैदान प्रवेश गर्दै डेब्यु गरेका हुन् ।
योगेश ४६औं मिनेटमा अमृत श्रेष्ठको स्थानमा मैदान प्रवेश गर्दै डेब्यु गरेका हुन् । यस्तै अन्जनले ८५औं मिनेटमा छिरिङको स्थानमा मैदान प्रवेश गर्दै डेब्यु गरे ।
छिरिङ र योगेशसहित फरवार्ड राजेश परियार पहिलो पटक राष्ट्रिय टिममा परेका हुन् ।
छनोट अन्तर्गत समूहको दोस्रो खेल नेपालले मंसिर ५ गते दशरथ रंगशालमा यमनसँग खेल्नेछ ।
source https://www.onlinekhabar.com/2023/11/1393361
0 comments:
Post a Comment