२१ जेठ, काठमाडौं । एएफसी एसियन कप छनोटको तयारीमा कतारमा रहेको नेपाली फुटबल टोली ओमानसँगको मैत्रीपूर्ण खेलमा पराजित भएको छ ।
कतारको सुहिम बिन हामद स्टेडियममा शुक्रबार राति भएको खेलमा नेपाल ओमानसँग २-० ले पराजित भएको हो । ओमानको जितमा ओमार अल मलिकी र इशाम अल सुभीले एक एक गोल गरे ।
कुवेतमा एसियन कप छनोट खेल्न जानुअघि नेपालले कतारमा तयारी गर्दै तीन वटा अभ्यास खेल खेलेको थियो ।
जसमा टिमोर लिस्टेको यू-२३ टोलीसँग २-२ गोलको बराबरी खेलेको नेपालले श्रीलंकासँग १-१ को बराबरी खेलेको थियो ।
कतारमा तयारीपछि नेपाली टोली उतैबाट शनिवार कुवेत जाने अखिल नेपाल फुटबल संघ एन्फाले जनाएको छ ।
एसियन कप छनोटमा नेपाल समूह ए मा छ । यस समूहमा जोर्डन, कुवेत र इन्डोनेसिया छन् ।
नेपालले छनोटको पहिलो खेल जुन ८ मा जोर्डनसँग खेल्नेछ भने कुवेतसँग जुन ११ र इन्डोनेसियाविरुद्ध जुन १४ मा खेल्नेछ ।
source https://www.onlinekhabar.com/2022/06/1137550
0 comments:
Post a Comment