२२ फागुन,काठमाडौं । स्पानिस ला लिगाको शीर्ष स्थानमा रहेको रियल मड्रिड शनिबार राति भएको खेलमा रियल सोसिडाडलाई ४-१ ले पराजित गरेको छ ।
घरेलु मैदानमा एक गोलले पछि परेको अवस्था उल्टाएर रियलले तीन अंक जोडेको हो । यस जितपछि लिग लिडर रियलले दोस्रो स्थानको सेभियामाथि ८ अंकको अग्रतासमेत बनाएको छ ।
सेभिया अलाभेजसँग गोलरहित बराबरीमा रोकिंदा रियलले त्यसको फाइदा उठाउँदै उपाधि होड बलियो बनाउँदै लगेको हो ।
रियलको २७ खेलबाट ६३ अंक छ । समान खेलबाट सेभियाको ५५ अंक छ ।
सान्टियागो बर्नाबेउमा भएको खेलको दशौं मिनेटमा मिकेल ओयार्जाबलले पेनाल्टीबाट गोल गर्दै सोसिडाडलाई अग्रता दिलाएका थिए । तर अग्रता लामो समय भने टिकेन ।
४०औं मिनेटमा एडुवार्डो कामाभिंगारले रियलका लागि बराबरी गोल फर्काए । ४३औं मिनेटमा लुका मोड्रिचले गोल गरेपछि रियल पहिलो हाफमै २-१ को अग्रता बनायो ।
करिम बेन्जिमाले ७६औं र मार्को एसेन्सियोले ७९औं मिनेटमा गोल गरेपछि रियलले ४-१ को जित निकाल्यो ।
source https://www.onlinekhabar.com/2022/03/1089489
0 comments:
Post a Comment