२० वैशाख, जनकपुरधाम । गलत नतिजा दिने पीसीआर मेसिनलाई थन्काइएपछि प्रदेश २ मा अर्काे मेसिन आइपुगेको छ । प्रादेशिक प्रयोगशाला जनकपुरधाममा नयाँ मेसिन ल्याइएको हो । नयाँ मेसिन जडान गर्ने तयारी भइरहेको प्रयोगशालाले जनाएको छ ।
संघीय सरकारको स्वास्थ्य तथा जनसंख्या मन्त्रालयले यसअघिकै मोडेलको नयाँ मेसिन पठाएको प्रयोगशालाका प्रमुख रामबिनय साहले जानकारी दिए ।
‘पुनः सोही मोडेलको अर्काे मेसिन आएको छ,’ प्रादेशिक प्रयोगशालाका प्रमुख रामबिनय साहले भने, ‘मेसिन मात्रै अर्काे हो । सबै थोक पहिलाकै जस्तो छ ।’ नयाँ मेसिनबाट पनि पहिलेको जस्तै दैनिक १० जनाको नमूना परीक्षण हुने साहले जानकारी दिए ।
ठूलो मेसिन पठाइदिएको भए परीक्षण गर्न सजिलो हुने भए पनि पुनः त्यही मोडेलको मेसिन पठाइएकाले परीक्षणले गति लिन नसक्ने उनको भनाइ छ ।
यो मेसिनलाई मोटरसाइकलको संज्ञा दिँदै उनले भने ‘जसरी मोटरसाइकलले एक पटकमा एक जनालाई मात्रै बोक्न सक्छ, यो मेसिन पनि यस्तै हो । अहिले हामीलाई मोटरसाइकल होइन, एकसाथ सयौं जनालाई बोक्न सक्ने रेलको आवश्यक्ता छ ।’
स्वास्थ्य तथा जनसंख्या मन्त्रालयले पहिलो पटक पठाइएको मेसिन गत चैत २१ गतेबाट सन्चालनमा आएको थियो । यो मेसिनबाट १ सय २ जनाको परीक्षण गर्दा सबैको रिपोर्ट नेगेटिभ आएको थियो ।
यो पनि पढ्नुहोस गलत रिपोर्ट दिने जनकपुरको कोरोना परीक्षण ल्याब बन्द
तर, परीक्षण गरिएकामध्ये रौतहटका दुई जना र सर्लाहीका १ जना बालकको स्वाब पुनः परीक्षणका लागि राष्ट्रिय प्रयोगशाला काठमाडौं पठाउँदा पोजेटिभ देखिएको थियो । प्रादेशिक अस्पतालमा गरिएको परीक्षण नेगेटिभ र काठमाडौंमा पोजेटिभ देखिएपछि पीसीआर मेसिन थन्काइएको थियो । उक्त मेसिन थन्काएर परीक्षण बन्द गरिएपछि संकलन गरिएका स्वाबहरु काठमाडौं पठाइँदै आएको छ ।
मेसिन बन्द हुँदा पनि काम जारी
यसअघि संघीय सरकारले पठाएको मेसिनले लगातार नेगेटिभ रिपोर्ट मात्र दिएपछि त्यसलाई बन्द गर्दासमेत काममा लागिपरेको बताउँछन् प्रयोगशाला प्रमुख साह । मेसिन नभए पनि आफूले काम नरोकेको बताउँदै प्रमुख साहले थ्रोट स्वाब संकलन गर्नेदेखि अन्य जिल्लामा नमूना परीक्षण गरी समयमा रिपोर्ट दिँदै आएको बताए ।
‘मेसिन बन्द छ, तर स्वाब संकलन गर्दै समयमै रिपोर्ट दिने काम गर्दै आएका छौं,’ उनले भने । उनले स्वाब परीक्षणका लागि काठमाडौं, हेटौंडा र धरान पठाइरहेको र नयाँ मेसिन सन्चालनमा नआउन्जेलसम्म पठाइरहने बताए ।
‘मेसिन बन्द भएपछि सर्वसाधारणमा नकारात्मक सन्देश जानु स्वाभाविक हो,’ साह भन्छन्, ‘तर यहाँ कुनै किसिमको काम रोकेका छैनौं । समयमै सबै काम गर्दै आएका छौं ।’
source https://www.onlinekhabar.com/2020/05/860193
