सिड्नी / अंग्रेजी नया वर्ष रमाइलो र अर्थपूर्ण रुपमा नेपालमा मनाउन सयौं अस्ट्रेलियन पर्यटक नेपाल पुगेका छन् । उनीहरु मध्ये धेरै नेपाली मुलका अस्ट्रेलियन पर्यटक छन् ।
नयाँ वर्ष २०२० को जनवरी १ को अस्ट्रेलियन समय (सिड्नी/क्यानबेरा) अनुसार बिहान नौ बजेसम्म अनलाइनखबर अस्ट्रेलिया संस्करणको सम्पर्कमा आएका केही अस्ट्रेलियन पर्यटकहरुले आफ्नो नेपाल बसाइँ कसरी महत्वपूर्ण बनाउँदै छन् भन्ने योजना सुनाए ।
जनवरी १ मा उद्घाटन हुने भिजिट नेपाल २०२० को कार्यक्रममा सहभागी हुने लक्ष्यसहित मंगलवार राति सिड्नीबाट उडेको गैरआवासीय नेपाली संघ अस्ट्रेलियाको टोली चीनको गोन्जाउबाट सम्पर्कमा आयो ।
‘अस्ट्रेलिया-नेपाल गौरवमय यात्रा अभियान’ नाम दिएको उक्त भ्रमण टोलीका संयोजक खेम शर्माले आफ्नो टिमको पाँच दिने कार्यतालिका सुनाए ।
उनका अनुसार बुधवार मध्यान्नअघि नै काठमाडौं पुगेर उक्त टिम नेपाल पत्रकार महासंघले आयोजना गर्ने एक कार्यक्रममा सामेल हुनेछ ।
यो टिम र नेपाल पत्रकार महासंघबीच बुधवार नै नेपालका सात प्रदेशका सात जना पर्यटन बिटमा समाचार लेख्ने पत्रकारलाई लेखनवृति प्रदान गर्नेबारे सहमतिमा हस्ताक्षर हुने छ ।
नेपाल पत्रकार महासंघका महासचिव रमेश बिष्टले यसबारे पुष्टि गर्दै भने- बुधवार काठमाडौं आएको गैरआवासीय नेपाली संघको अस्ट्रेलियन नेपलिज जर्नालिस्ट एशोसियसनको समन्वयमा लेखनवृति सम्बन्धी हस्ताक्षेर हुनेछ ।
आगामी वैशाख १ गते नेपाली नयाँ वर्षमा सातै प्रदेशमा कार्यक्रम आयोजना गरी प्रत्येक प्रदेशका १ जना पर्यटन पत्रकारलाई ५० हजार लेखनवृत्ति प्रदान गरिने छ ।
भरतपुरमा निर्माणाधीन गौतम बुद्धअन्तर्रास्ट्रिय रंगशाला निर्माणमा खटेका कलाकार सिताराम कट्टेलले जनवरी ३ मा गैरआवासीय नेपाली संघ अस्ट्रेलियाको टिमसँग मैत्रीपूर्ण क्रिकेट खेल हुने र रंगशाला निर्माणमा २ लाख ५० हजार नेपाली रकम प्राप्त हुने पुष्टि गरे । यो टोलीले चितवनमा धुर्मुस सुन्तली फाउन्डेसनसँग मैत्रीपूर्ण क्रिकेट खेल्ने र सहयोग रकम हस्तान्तरण गर्ने छ ।
त्यस्तै अस्ट्रेलिया-नेपाल गौरवमय यात्रा अभियानकै क्रममा उक्त टिम जनवरी ४ मा धुलिखेल नगरपालिका जाने छ । जहाँ गैरआवासीय नेपाली संघ अस्ट्रेलिया र धुलिखेल नगरपालिकाबीच नेपाल जीवन गुमाउने अस्ट्रेलियन पर्यटकको स्मृतिमा नमुना पार्क निर्माणमा सहमति गर्ने कार्यक्रम रहेको छ ।
साथै यो टिमले नेपालका सरकारी तथा निजी क्षेत्रका ब्यक्तिहरुसँग भेटघाट गर्ने योजना पनि बनाएको छ । बुधवार बिहान सिड्नीबाट उडेर साँझ सपरिवार काठमाडौं पुग्ने लक्ष्य लिएका प्रवासमा क्रियाशील नेपाली साहित्यकार निष्प्रभ सजिले आगामी शनिवार काठमाडौंमा साताको साहित्य पुरस्कार वितरण कार्यक्रम नेपाल पर्यटन बोर्डमा राखेका छन् ।
भिजिट नेपाल २०२० को सन्दर्भसमेत राखेर काठमाडौंमा हुने साहित्यिक जमघटले प्रवास र नेपालमा भएका साहित्यकारहरु बीच पुनर्मिलन समेत गराउने छ ।
चर्चित उपन्यास ‘डार्लिङ्ग हार्बर’का लेखक निस्प्रभ सजिले सिड्नीबाट उड्नुअघि आफ्ना पाठकहरुलाई यो वर्षभित्रमा ‘चिनी’ नामक नया उपन्यास प्रकाशित गर्ने जानकारी दिएका छन् ।
उनले भनेका छन् – नेपाल भ्रमणको समयमा सम्पादनको काम सक्ने छु र यदी सबै परिस्थितिले साथ् दिएमा यो वर्षको अन्त्यतिर पुस्तक प्रकाशित हुनेछ ।
उनी नेपाल बसाइँका क्रममा आफ्ना दुईजना छोरीहरुलाई आफू र श्रीमती तर्फका सबै नातेदारहरुसँग भेटघाट र घुलमिल गराउने योजनामा पनि छन् ।
अस्ट्रेलियाका युबा ब्यबसायी डा किरण थापा पनि बुधवार बिहान सिड्नीबाट काठमाडौं उडेका छन् । उनी आफ्नो अस्ट्रेलियन ब्यबसायको ब्राण्डलाई नेपालमा पनि बिस्तार गर्ने तयारीमा छन् ।
किरण आफ्नो नेपाल बसाइँका क्रममा नौ जनाको नेपाल टिमसँग अन्नपूर्ण आधार शिबिर आसपास घुम्ने योजनामा छन् । नेपालका साना ब्यबसायीहरुको जीवन संघर्षलाई नजिकबाट अनुभूत गर्ने सोचाइ उनको छ ।
सिड्नीबाट उडान भर्नुअघि अनलाइनखबरसंग किरणले भने – अर्बौ सम्पत्ति भएकाहरु अमनचैनमा छैनन् तर एउटा नाग्लोमा ब्यापार गर्ने नेपाली दिनभर ब्यापार भएन भने पनि साँझ कसरी खुशी साथ् घर फर्किन्छ, त्यो कुरा म जान्न चाहन्छु ।
उनी त्यस्तै स-सानो ब्यबसायबाट पनि जिन्दगीमा खुशी भएका नेपालीसँगको अस्तरक्रिया र भेटघाटबाट प्राप्त हुने ज्ञानलाई ‘हिमालयन विश्डम’ भन्न रुचाउँछन । उनी त्यहीँ हिमाली ज्ञानमाथि पुस्तक लेख्ने योजनामा पनि छन् ।
source https://www.onlinekhabar.com/2020/01/824892
0 comments:
Post a Comment