बार्सिलोना। स्पेनमा गुरुङ जातिहरुको महान पर्व तमु ल्होसार आइतवार एक भब्य कार्यक्रमकाबीच सम्पन्न भएको छ। तमु समाज बार्सिलोनाको आयोजनामा स्थानीय कलाकारहरुको बेजोड प्रस्तुतिसँगै कार्यक्रम सम्पन्न भएको हो। समाजले सन् २००७ देखि आयोजना गर्दै आएको ल्होसार बिशेष कार्यक्रम यो १३ औं पटक हो।
गुरुङ गीत ‘सिरमा सलि टहमा’ बाल कलाकारहरु सहिल तमु, निपूर्ण तमु, प्रेरक तमु, सृष्टि तमुस्यो, सारा तमुस्यो र प्रेक्षा तमुस्योले जोडदार नृत्यसँगै साँस्कृतिक कार्यक्रमको सुरुवात भएको थियो।
कलाकारहरु चुनु तमुस्यो र प्रबेश तमुको प्रस्तुतिले कार्यक्रममा सबैको ध्यान खिच्न सफल बन्यो। अहिलेको चर्चित लोकप्रिय गीत’साली मन पर्योमा’ यो जोडीले नृत्य प्रस्तुत गर्दा दर्शकहरु रमाए। ‘यो कुरा गोप्य छ’ बोलको गीतमा बाल कलाकारहरुको प्रस्तुतिले पनि दर्शकको ध्यान तानेको थियो। विदेशमा नै जन्मेर यतै हुर्केका दोस्रो पुस्ताका बालबालिकाहरुको नेपाल गीत संगीतप्रतिको लगाव तारिफ योग्य रह्यो।
यस्तै गायनतर्फ एमा गुरुङ, युनिक गुरुङ, प्रमेश गुरुङ, सुनिल गुरुङ, तुलसी गुरुङ, विनोद बराईली, भूमि गुरुङ र समी गुरुङले एकल तथा सामूहिक प्रस्तुतिहरु राखेका थिए। बालकलाकारहरु साहिल गुरुङ, निपूर्ण गुरुङ, प्रणय गुरुङ, मिसल गुरुङ, प्रंशसा गुरुङले पनि स्टेज तताए।
बिभिन्न गुरुङ गीतहरुमा पुनम गुरुङ, निशा गुरुङ, शुब्बा गुरुङ, शोभा गुरुङ, रेवाती गुरुङ, समिर गुरुङ, हरी गुरुङ, बिशाल गुरुङले जोडदार नृत्य प्रस्तुत गरे। सिन्जल गुरुङको कोरियोग्राफी निकै प्रसंशनीय थियो।
यसअघि म्याड्रिडस्थित नेपाली दूतावासमा कार्यभार सम्हालेकी नवनियुक्त राजदूत दावा फूटी शेर्पाले कार्यक्रमको उद्घाटन गरेकी थिइन्। पहिलोपटक नेपाली समुदायलाई सम्बोधन गर्दै उनले घरदेखि टाढाको पहिलो ल्होसार नेपाली समुदायमाँझ मनाउन पाउदा खुशी ब्यक्त गरिन्।
समाजका अध्यक्ष गौतम गुरुङको सभापतित्वमा सम्पन्न कार्यक्रममा एनआरएनए युरोप उपसंयोजक मुक्त बहादुर गुरुङ,एनआरएनए आईसीसी मानार्थ परिषद सदस्य दीपक खरेल, आईसीसी सदस्य सुनिल रानाभाट, एनआरएनए स्पेनका अध्यक्ष दिनेश गुरुङ(देउकाजी) लगायतले ल्होसारको अबसरमा शुभकामना ब्यक्त गरेका थिए।
गुरुङ समुदायबाट बिभिन्न क्षेत्रमा सफलता हासिल गरेका व्यक्तित्वहरु कार्यक्रममा सम्मानित भएका थिए।
source https://www.onlinekhabar.com/2019/12/824538
0 comments:
Post a Comment