काठमाडौं । क्यानडाले फिफा विश्वकप फुटबलमा आफ्नो पहिलो गोल गरेको छ । कतारमा जारी विश्वकप अन्तर्गत आइतबार क्रोएसिया विरुद्धको खेलको सुरुमै क्यानडाले गोल गर्दै अग्रता लिएको हो ।
अल्फोन्सो डेभिसले खेल सुरु भएको ६८ सेकेण्डमै गोल गर्दै क्यानडालाई अग्रता दिलाएका छन् । यो गोल जारी विश्वकपकै सबैभन्दा छिटो गोल हो ।
दोस्रो पटक विश्वकप खेलिरहेको क्यानडा पहिलो खेलमा बेल्जियमसँग १-० ले पराजित भएको थियो । उक्त खेलमा क्यानडाका डेभिसले नै पेनाल्टी गुमाएका थिए ।
विश्वकपमा आफ्नो देशको लागि पहिलो गोल गर्ने खेलाडी पनि उनै डेभिस बने । त्यो पनि खेलको सुरु भएको दोस्रो मिनेटमै गोल गर्दै इतिहास रचे । सन् १९८६ मा पहिलो पटक विश्वकप खेल्दा क्यानडा समूहको तीनवटै खेल हार्दै बाहिरिएको थियो । उक्त विश्वकपमा फ्रान्स, शोभियत रुस र हंगेरीसँग क्यानडा पराजित भएको थियो ।
source https://www.onlinekhabar.com/2022/11/1225411
0 comments:
Post a Comment