१० साउन, काठमाडौं । नेपाली कांग्रेसले टोल समितिसम्म सामाजिक सञ्जालमा एकाउन्ट सञ्चालन गर्ने भएको छ । बुधबार सकिएको केन्द्रीय समिति बैठकले पार्टीको केन्द्रीय कार्यसमितिदेखि टोल समितिसम्म पार्टीको नाम, झण्डा, चुनाव चिह्न प्रयोग गरी फेसबुकलगायतका सामाजिक सञ्जालमा एकाउन्ट सञ्चालन गर्ने निर्णय गरेको हो ।
तर पार्टीको नाम,झण्डा, चुनाव चिह्नको दुरुपयोग गरी व्यक्तिले सञ्चालन गरेको एकाउन्ट तत्काल बन्द गराउन सचेत गराएको छ । तत्काल बन्द नगरे कारबाही गरिने कांग्रेसको निर्णयमा उल्लेख छ ।
हेर्नुहोस् सामाजिक सञ्जालसम्बन्धी कांग्रेसको निर्णय :
सूचना, संचार र प्रविधिको उच्चतम प्रयोगलाई आज कसैले पनि इन्कार्न सक्दैन । यसको सहि प्रयोगले पार्टी संगठन विस्तारमा पर्याप्त फाइदा हुने कुरामा कुनै दुविधा छैन र आजको विश्वमा कोही पनि व्यक्ति सामाजिक सञ्जालबाट अलग रहने कुरा सम्भव पनि छैन । तर यसको दुरुपयोगले व्यक्ति, परिवार, समाज, दल, संगठन र राष्ट्रलाई समेत गम्भीर क्षति पुगेको, विभिन्न खाले अपराधका घटना घटेको यथार्थलाई पनि विर्सन सकिदैन ।
यस सन्दर्भमा, नेपाली कांग्रेसको विचार, सिद्धान्त, कार्यक्रमहरुलाई जनता बीच लिएर जान पनि सामाजिक सञ्जालको प्रयोग आवश्यक छ । त्यसैले पार्टी संगठन निर्माण र विस्तारमा सामाजिक सञ्जालको उच्चतम प्रयोग गर्न पार्टी संगठनका सबै तह केन्द्रीय कार्यसमिति, प्रदेश कार्यसमिति, जिल्ला कार्यसमिति, संसदीय क्षेत्रीय कार्यसमिति, प्रदेश क्षेत्रीय कार्यसमिति, गाँउ÷नगर पालिका कार्यसमिति, वडा कार्यसमिति र टोल समितिले “पार्टीको नाम, झण्डा, चुनाव चिन्ह” प्रयोग गरी सामाजिक सञ्जालमा आफ्नो छुट्टै आधिकारिक एकाउण्ट आवश्यकता अनुसार संचालन गरिनेछ । तर पार्टीको नाम, झण्डा र चुनाव चिन्हको दुरुपयोग गरी विभिन्न व्यक्तिहरुले संचालन गरेका यस्ता एकाउन्टहरुलाई तत्काल बन्द गर्न सचेत गराइन्छ । सो नगरे आवश्यक कारवाही अगाडि बढाउने समेत स्पष्ट गरिन्छ ।
source https://www.onlinekhabar.com/2023/07/1342090
0 comments:
Post a Comment