१५ कात्तिक, काठमाडौं । राष्ट्रपति विद्यादेवी भण्डारी निजी भ्रमणको क्रममा स्याउ फार्म अवलोकन गर्न आज मनाङ जाँदैछिन् । सांसद पाल्देन छोपाङ गुरुङको मनाङ एग्रो स्याउ फार्म अवलोकन गर्न राष्ट्रपति भण्डारी मनाङ जान लागेकी हुन् ।
राष्ट्रपति भण्डारी स्याउ फार्म अवलोकन गर्न आउने जानकारी पाएपछि आफूलाई गर्व लागेको सांसद गुरुङले बताए । उनले भने, ‘अहिलेसम्म कुनै पनि राष्ट्रपति मनाङ आउनु भएको थिएन । आज नेपालको पहिलो महिला राष्ट्रपतिज्यू मेरो स्याउ फार्म अवलोकन गर्न आउँदै हुनुहुन्छ, म अत्यन्त खुसी छु, गर्व महसुस भइरहेको छ ।’
सांसद गुरुङले मनाङको मनाङ डिस्याङ गाउँपालिका वडा नम्बर १ को भ्राताङमा ७३३ रोपनी जग्गामा स्याउ खेती गरेका छन् । यसैगरी एयरपोर्ट नजिक ४ सय रोपनी जग्गामा फैलिएको स्याउ फार्म पनि छ । भ्राताङमा आफ्नो एकल लगानी भए पनि एयरपोर्ट नजिकको फार्ममा भने ४५ जना साझेदार रहेको उनले सुनाए ।
सांसद गुरुङले भने- राष्ट्रपति ज्यूको आगमनबाट मलाई थप ऊर्जा मिलेको छ, यो भ्रमणले आयात प्रतिस्थापनमा सहयोग गर्न फलफूल किसानहरुलाई प्रेरणा मिल्छ भन्ने मलाई विश्वास छ ।
स्याउ फार्ममा अहिलेसम्म साढे १७ करोड रुपैयाँ खर्च भइसकेको बताउँदै उनले भने, ‘हाम्रो खर्चको लक्ष्य २३ करोडसम्म छ ।’ दक्षिण एसियाकै ठूलो स्याउ फार्म दाबी गरिएको उनको फार्ममा हिमाली प्रोजेक्टले सहयोग गरेको छ । फुजी, गाला र गोल्डेन जातका स्याउ खेती गरेको उनले जानकारी दिए ।
उनले स्याउ फार्म सुरु गरेको साढे पाँच वर्ष भयो । अहिले साढे ६ लाख किलो स्याउ उत्पादन भइरहेको उनले सुनाए । ‘यहाँबाट २१ लाख किलो स्याउ उत्पादन गर्ने लक्ष्य छ,’ उनले अनलाइनखबरसँग भने, ‘अलि धेरै स्याउ फलायो भने विदेश पनि निर्यात गर्न सकिन्छ ।’
राष्ट्रपतिको आगमनबाट स्याउ किसानहरुले गरेको मिहिनेतमा थप ऊर्जा मिलेको सांसद गुरुङले बताए । नेपालमा वाषिर्क १३ अर्बभन्दा बढीको स्याउ आयात हुने गरेको अनुमानित तथ्यांक सुनाउँदै उनले भने, ‘राष्ट्रपति ज्यूको आगमनबाट मलाई थप ऊर्जा मिलेको छ, यो भ्रमणले आयात प्रतिस्थापनमा सहयोग गर्न फलफूल किसानहरुलाई प्रेरणा मिल्छ भन्ने मलाई विश्वास छ ।’ उनले किसानहरुलाई अनुदान लगायत थप प्रेरणामुलक सहयोग गरोस् भन्ने चाहेको उनले बताए ।
मनाङ जनसंख्या भएको जिल्ला भएकाले स्थानीय कामदार पाउन समस्या भएको उनले सुनाए । जिल्ला बाहिरबाट कामदार ल्याउनुपरेको उनले बताए । प्रायजसो गोर्खा, मकवानपुर, धादिङ, नुवकोट लगायत जिल्लाबाट कामदार ल्याउने गरेको उनले बताए ।
source https://www.onlinekhabar.com/2021/11/1032736
0 comments:
Post a Comment