५ भदौ, काठमाडौं । नेपाली राष्ट्रिय क्रिकेट टिम ३० अगष्टमा सुरु हुने एसिया कप खेल्न पाकिस्तान प्रस्थान गरेको छ ।
पाकिस्तान र श्रीलंकामा हुने एसिया कपमा नेपालले मुल्तानमा घरेलु टोली पाकिस्तानसँग र श्रीलंकामा भारतसित खेल्ने छ । काठमाडौंमा भएको एसिसी प्रिमियर कप जितेको नेपाल इतिहासमै पहिलो पल्ट एसिया कपको मैदानमा उत्रिन लागेको हो ।
विश्व क्रिकेटमा शक्ति राष्ट्र भारत र पाकिस्तानसँगको खेललाई नेपालले एक्सपोजर भन्दा पनि ठूला टिमसँग प्रतिस्पर्धा गर्ने अवसरको रुपमा लिएको छ ।
पाकिस्तान उड्नुअघि अनलाइनखबरसँगको कुराकानीमा कप्तान रोहितकुमार पौडेलले भने, ‘हामीले यसभन्दा अगाडि धेरै एक्सपोजर पाइसक्यौं । एसिया कप हाम्रो लागि एक्सपोजर भन्दा पनि प्रतिस्पर्धा हुनेछ ।’
पहिलोपल्ट भारत र पाकिस्तानको राष्ट्रिय टिमसँग खेल्न लागेको नेपाललले एक महिनाअघि मात्रै एसिसी इमर्जिङ् टिम्स एसिया कपमा भारत र पाकिस्तानकै ए टिमसँग खेलेको थियो । त्यसअघि विश्वकप क्रिकेट छनोटमा टेष्ट मान्यताप्राप्त जिम्बाब्वे र वेष्टइण्डिजसँग प्रतिस्पर्धा गरेको थियो ।
श्रीलंकामा नै भएको एसिसी इमर्जिङ टिम्स एसिया कपपछि नेपालले त्यहीका ए ग्रेडका टिमसँग पनि खेलेको थियो । जसले गर्दा श्रीलंकाको विकेट नेपालका लागि परिचित छ ।
तर पहिलो पल्ट एसिया कप खेल्न लागेको नेपाललाई पहिलो खेल हुने पाकिस्तानको मुल्तान भने नयाँ भेन्यु हो । त्यसैले नेपाली टिम त्यहाँको वातावरणसँग घुलमिल हुन प्रतियोगिता सुरु हुनुभन्दा एक हप्ता अघि नै पाकिस्तान प्रस्थान गरेको हो ।
‘हाम्रो लागि दुईवटा खेल दुईवटा फरक भेन्युमा खेल्न केही चुनौती त हुनेछ । तर त्यसकै तयारीका लागि हामी त्यहाँको विकेट र वातावरण बुझ्न एक हप्ता अघि नै पाकिस्तान जाँदैछौं । त्यहाँ तयारी र केही अभ्यास खेलहरु खेल्नेछौं’, कप्तान रोहितले भने ।
मुल्तानसँग पाकिस्तानसँग खेलेपछि नेपालले श्रीलंका गएर ४ सेप्टेम्बरमा केण्डीमा भारतसँग खेल्ने छ ।
विश्व क्रिकेटमा नेपाललाई चिनाउने प्लेटफर्म
नेपाली क्रिकेटका लागि एसिया कप विश्व क्रिकेटमा नेपाललाई चिनाउने प्लेटफर्म पनि हुन सक्छ । भारत र पाकिस्तान विश्वका दुई क्रिकेट महारथीको खेल विश्वका लगभग सबै क्रिकेट प्रेमीले हेर्नेछन् । जसबाट नेपाली क्रिकेटले विश्व जगतमा पहिचान बनाउन मद्दत पुग्ने छ ।
‘हाम्रो सोचाइ नेपाली क्रिकेटलाई विश्वसामु चिनाउने हो,’ रोहितले भने, ‘भारत र पाकिस्तानको खेल सबैले हेरिरहेका हुन्छन्, हामी यो दुई खेल उत्कृष्ट खेल्ने भन्नेमा नै छौं ।’
सन् २०१४ मा टी–२० विश्वकप खेलेको नेपालले त्योपछि खेल्न लागेको यो सबैभन्दा ठूलो प्रतियोगिता हो । जसमा नेपाली क्रिकेटमाथि विश्वको नजर पर्नेछ ।
‘यो हाम्रो लागि एकदमै राम्रो अवसर हो । हामी सामान्यतयः भारत र पाकिस्तानसँग खेल्ने अवसर पाउँदैनौं । त्यसैले पनि मैले यसलाई अवसरको रुपमा लिएको छु । अवसरलाई सम्मान गर्दै राम्रो क्रिकेट प्रदर्शन गर्न सकौं त्यहि नै अपेक्षा छ,’ कप्तान रोहितले सुनाए ।
उनका अनुसार नेपाली क्रिकेटको परिदृष्य परिवर्तन गर्न र उचाइमा पुर्याउन एसिया कपले निकै महत्वपूर्ण भूमिका निर्वाह गर्नेछ । ‘त्यो दिनमा सबैले हाम्रो खेल हेर्नु हुनेछ । त्यो दुई खेलमा हामीले राम्रो गरेको अवस्थामा अन्य टिम पनि नेपाल आएर खेल्ने चाहना राख्न सक्छन्,’ रोहितले भने ।
सन् २०१८ मा एक दिवसीय मान्यता पाए पनि नेपालले ठूला टिमसँग खेल्न पाएको छैन । हाम्रै वरिपरका भारत र पाकिस्तानसँगै बंगलादेश, श्रीलंका, र अफगानिस्तानले नियमित रुपमा क्रिकेट खेलिरहेका छन् । कुनै समय नेपालभन्दा कमजोर रहेको अफगानिस्तानले विश्व क्रिकेटमा आफ्नो स्थान बनाइसकेको छ ।
कमजोरी सुधार्न अभ्यास र आत्म विश्वास बलियो
लगातारको झरीले नेपालले राम्ररी अभ्यास गर्न पाएको छैन । नेपाली टिम ३/४ दिनको प्रशिक्षणबाटै पाकिस्तान गएको छ ।
विश्वप छनोट र त्यसपछिको एसिसी इमर्जिङ टिम्प एसिया कपमा नेपाली ब्याटरलाई सर्ट बल खेल्न समस्या भएको थियो । त्यो समस्या सुधारका लागि नेपाली टिमले श्रीलंकामा र नेपाल फर्केर पनि इन्डोरमा सर्ट बल खेल्ने अभ्यास गरेको छ ।
कप्तान रोहितका अनुसार नेपाली टिमको बलियो आत्मविश्वास र कमजोरीहरुमाथि खेलाडीको सुधार नै नेपाली टिमको एसिया कप तयारी हो ।
‘दुवै टिम एकदमै राम्रा टिम छन् । अब हामीले गर्ने भनेको प्रोसेस हो । बल हेरेर खेल्ने हो । टेष्ट राष्ट्रसँग भनेर हामीले वेष्ट इन्डिजसँग खेलिसकेका छौं । बलमा प्रेजेन्ट भएर खेल्यौं भने हामी राम्रो गर्न सक्छौं’, बिदाइ कार्यक्रममा रोहितले भने ।
आत्मविश्वास बलियो भएको नेपाली टिमले पूर्ण सदस्यीय देशलाई पनि हराउन सक्छ भन्ने विश्वास प्रशिक्षक मोन्टी देशाईँ पनि राख्छन् ।
‘५–६ महिना हामी जित्ने मानसिकताले खेलिरहेका थियौं । म त्यो मानसिकता कहिल्यै परिवर्तन नहोस् र बारम्बार देखियोस् भन्ने चाहन्छु’, पाकिस्तान उड्नुअघिको बिदाइ कार्यक्रममा प्रशिक्षक मोन्टी देशाईँले भने ।
उनी भन्छन्, ‘हरेक खेलले कथा लेख्नेछ । हरेक खेलको नयाँ पाटो हुनेछ । हरेक कुरा दोहोर्याउनु पर्छ । हामीमा उत्साह छ । विश्वकप छनोटमा पनि हामीले राम्रो खेलेका हौं ।’
उनका अनुसार पूर्ण सदस्य राष्ट्रको लामो इतिहास छ । ‘तर एशोसियट राष्ट्रले पनि मेहनत उत्तिकै गरेका हुन्छन्,’ मोन्टी भन्छन्, ‘उनीहरुले पनि पूर्ण सदस्य राष्ट्रलाई हराउन सक्छन् ।’
राष्ट्रिय टोलीका भरपर्दा स्पीनर सन्दीप लामिछानेले एसिया कप खेल्ने नखेल्ने टुंगो छैन । स्वास्थ्यको कारण देखाएर उनी टोलीमा गएका छैनन् ।
नेपाल क्रिकेट संघ क्यानले उनलाई टोलीमा लैजान प्रयास गरिरहेको बताएको छ । कप्तान रोहित सन्दीप टोलीमा नभए उनको स्थान अरु खेलाडीले लिन नसक्ने बताउँछन् ।
चुनौतीसँगै आएको अवसर
नेपालका लागि भारत र पाकिस्तानसँग खेल्नु कम चुनौती होइन । कप्तान रोहितकै लागि पनि यो चुनौतीसँग आएको अवसर हो ।
एसिया कपमा देशको प्रतिनिधित्व गर्ने कान्छा कप्तानका रुपमा उनले आफूले सानैदेखि पछ्याइरहेका रोहित शर्मासँग टस गर्नेछन् । जसलाई लिएर उनी उत्साहित छन् ।
‘म निकै उत्साहित छु, आफूले सानैदेखि पछ्याइरहेको रोहित शर्मासँग सँगै खेल्ने अवसर पाएको छु । यत्ति छ, कि त्यो खेलमा आफूले वेष्ट क्रिकेट खेल्न सकूँ’, उनले भने ।
रोहितका लागि मात्रै नभई नेपाली टिमकै लागि यो निकै राम्रो अवसर हो । टेलिभिजनमा हेरिरहेको टिमसँग प्रत्यक्ष खेल्नु धेरै नेपाली खेलाडीको सपना हो ।
‘भारत र पाकिस्तानको खेल हामी टेलिभिजनमा हेरिरहेका हुन्छौ । विराट कोहली, बाबर आजम विरुद्ध कसरी खेल्ने भन्ने हामी उत्साहित छौं । तयारी पनि सोही अनुसार गरिरहेका छौं ।’ उनले सबै खेलाडी निकै उत्साहित रहेको बताए ।
नेपालका लागि अर्को चुनौती भनेको विपक्षी टिमको घरेलु मैदानमा विपक्षी समर्थकको माझमा खेल्नु हो । हालसम्म त्रिवि क्रिकेट मैदानमा हजारौं नेपाली समर्थकमाझ खेलेको नेपालले सोही मात्रा वा अझ ठूलो पाकिस्तानको समर्थक माझ खेल्नु पर्ने हुन्छ ।
तर उक्त खेल र विपक्षी समर्थकमाझ खेल्न आफूहरु तयार रहेका रोहितले बताए । ‘हामीले विपक्षीको घरेलु मैदानमा खेल्दा उनीहरुको समर्थक हामीमाथि खन्निन्छन् त्यो हामीले जिम्बावेमा जिम्बावेविरुद्ध खेलेर अनुभव गरिसकेका छौं । त्यसैले पनि त्यो प्रेसर हामीले भान्न सक्छौं भन्ने विश्वास छ । त्यसमा हामी घुलमिल भइसकेका छौं ।’
तस्वीर तथा भिडियो : विकास श्रेष्ठ र आर्यन धिमाल/अनलाइनखबर
source https://www.onlinekhabar.com/2023/08/1354291
0 comments:
Post a Comment